ma olõ vihm

sünnütarõ laastukatusõl

ja vana vanni plekist põhja pääl

ja lauda takah nõgõsih

ja pedäjänõklo pääl mõtsah

ja hobõsõ kõrvakarvu tipuh

ma olõ vihm

üte vana naase põsil

sääl Setomaa karäaia kõrval

ja õdagutsõh pinihaugatusõh

ma olõ vihm

ma olõ vihm

pääle pikkä põuda

säält Kolodavitsast Miikseni

ja olõ makus nigu

karätsura uni

kõlgusõhõ visat edimädse

värske haina pääl

ma olõ mõnikõrd tuu vihm 
mis ikk ja laul.

--- Ilmar Vananurm